OGʻIZ BOʻSHLIGʻI XAVFLI OʻSMALARINI MULTISPIRAL KOMPYUTER TOMOGRAFIYASI (MSKT) YORDAMIDA DIAGNOSTIKA QILISHNING AMALIY AHAMIYATI

Ogʻiz boʻshligʻi toʻqimalarining yomon sifatli oʻsmalari butun dunyoda onkologik kasalliklar orasida oʻrta oʻrinda turadi (2–5%). Biroq bu lokalizatsiyadagi oʻsmalarning biologik xususiyatlari — agressiv oʻsish, tez metastazlanish, qaytalanishga moyilligi — ularni klinik jihatdan ahamiyatli guruhga kiritadi. Afsuski, koʻpchilik bemorlar kech bosqichda (III–IV) murojaat qiladi, bu esa diagnostika, davolash va prognozda jiddiy muammolar tugʻdiradi. Ushbu holatda aniqlik va tezlik bilan ishlaydigan zamonaviy diagnostika metodlarining oʻrni alohida ahamiyat kasb etadi. MSKT – multispiral kompyuter tomografiyasi ogʻiz boʻshligʻi va unga tutash anatomik strukturalarni batafsil tahlil qilish imkonini beruvchi samarali tasviriy tekshiruv usuli hisoblanadi.